"Airbus" kompaniýasy Awstraliýanyň "Qantas" awiakompaniýasynyň "Project Sunrise" taslamasy üçin döredilen "A350-1000ULR" aşa uzak aralyk üçin niýetlenen uçarynyň uçuş synaglaryna girişdi.
Täze howa gämileri raýat awiasiýasynyň taryhynda iň uzak dowam edýän yzygiderli ýolagçy uçar gatnawlaryny ýerine ýetirer.
"Qantas" üçin ilkinji uçar Tuluzadan Melburna çenli uzynlygy takmynan 17 müň kilometre deň bolan gonmazdan uçuşyny amala aşyrdy. Synaglar wagtynda inženerler uçaryň esasy ulgamlarynyň işini örän uzak uçuş şertlerinde barlaýarlar we howa gämisini täjirçilik taýdan ulanyşa taýýarlamak üçin maglumatlary ýygnaýarlar.
"Project Sunrise" taslamasy üçin "Qantas" 12 sany "A350-1000ULR" uçaryna sargyt berdi. Modifikasiýa goşmaça merkezi ýangyç bagyny we köpeldilen ýangyç ätiýajyny aldy, bu bolsa uçuş aralygyny ep-esli artdyrmaga mümkinçilik berdi. Şunda salonyň sygymy 238 ýolagça çenli azaldyldy.
"Vega" atly ilkinji tapgyrlaýyn uçary 2027-nji ýylyň aprel aýynda awiakompaniýa gowşurmak meýilleşdirilýär. Täze uçarlar ulanyşa girizileninden soň, "Qantas" Sidneý — London we Sidneý — Nýu-Ýork ugurlary boýunça dünýäde ilkinji yzygiderli gonman uçulýan gatnawlary açmagy maksat edinýär. Şeýle uçar gatnawlarynyň dowamlylygy 20 sagatdan gowrak wagt alar.
