83-nji Wenesiýa kinofestiwalynyň guramaçylary çäräniň maksatnamasyny hödürledi. Esasy bäsleşige 20 film girdi.
Festiwaly Denni Boýluň «Syýa» («Ink») filmi açar. Bu film mediamagnat Rupert Mördogyň we neşirýatçy Larri Lembiň Beýik Britaniýanyň «The Sun» tabloidini ösdürip başlan döwri barada gürrüň berýär. Esasy keşpleri Jek O'Konnell, Gaý Pirs we Kler Foý ýerine ýetirdi.
Esasy bäsleşikde «Altyn ýolbars» üçin «Syýa» bilen bir hatarda Keýsi Afflegiň «Kompaniýa», Meý el-Tuhiniň «Nätanyş zenan», Stefan Brizeniň «Gowy kiçi esger», Florian Zelleriň «Bunker», Ilýa Hržanowskiniň «Dau», Li Çan Donuň «Ähtimal söýgi», Lens Oppenhaýmyň «Praým-taým» filmleri we beýlekiler göreşer.
Bäsleşikden daşary festiwalda Aleks Gibniniň «Mask», Ahmed Hassunyň «Raýat Usama», Wim Wendersiň «Içinden: Piter Sumtoryň binagärligi», Aleksandr Smianyň «Ýupiter», Halkaut Mustafanyň «Aýal öldürse, jennet ýokdur» filmleri we beýlekiler görkeziler.
Festiwaly italiýaly režissýor Jowanni Weroneziniň soňky işi bolan «Hudaý gülýär» filmi ýapar (lenta bäsleşikden daşary görkeziler). Filmde Pýerfrançesko Fawino XVII asyrda Toskanadaky monahyň roluny oýnaýar, ol Hudaý barada ybadathanada kabul edilenden has optimistik gürlemegi başarýar. Ýöne onuň ýeňil-ýelpaý çemeleşmesi ruhanylaryň arasynda duşmançylyk döredýär.
83-nji Wenesiýa kinofestiwaly 2-nji sentýabrdan 12-nji sentýabr aralygynda Italiýanyň Lido adasynda geçiriler. Emin agzalaryna aktrisa we režissýor Meggi Jillenhol ýolbaşçylyk eder.
