Emeli aňy ulanmak mekdep okuwçylaryna öý ýumuşlaryny has çalt ýerine ýetirmäge we ýokary bahalary almaga kömek edýär. Ýöne wagtyň geçmegi bilen bu ýagdaý synaglaryň netijelerine ters täsir edip biler.
«Centre for Economic Policy Research» guramasynyň çekişmeli hasabatynda gözlegçiler şeýle netijä geldi.
Ykdysatçylar Dewid Stremberg, Wiktor Leý we Ýanhuý Wu 30 aýyň dowamynda 7–12-nji synplarda okaýan 26 811 hytaýly okuwçynyň maglumatlaryny seljerdi. Olar öý tabşyryklary üçin alnan bahalary, olary ýerine ýetirmegiň wagtyny, daşky kömegi ulanmak gadagan edilýän aýlyk synaglarynyň netijelerini, şeýle hem ýokary mekdeplere we uniwersitetlere giriş synaglarynyň jemlerini öwrendi.
Generatiw emeli aň ulanylyp başlanandan soň, öý ýumuşlary üçin bahalar ortaça 18% ýokarlandy, olary ýerine ýetirmegiň wagty bolsa 30% azaldy. Şol bir wagtyň özünde, eýýäm alty aýdan soň aýlyk synaglarynyň netijeleri, takmynan, 20% peseldi.
Giriş synaglarynda peselme 18%-den 24%-e çenli boldy, has görnetin oňyn däl täsir bolsa, takmynan, iki ýyldan soň ýüze çykdy.
Gözlegiň awtorlary emeli aňyň okuwçynyň deregine akyl zähmetiniň bir bölegini ýerine ýetirmäge ukyplydygyny belleýär. Netijede, öý işleri has gowy ýerine ýetirilen ýaly görünýär, ýöne mekdep okuwçylary materialy özbaşdak seljermäge we bilimleri berkitmäge has az wagt sarp edýär.
Gözlegçiler bu işiň entek jemleýji ylmy ylalaşyk däldigini belleýär. Mundan başga-da, bu gözleg emeli aňyň islendik ulanylyşynyň hökman okuwy ýaramazlaşdyrýandygyny subut etmeýär: ahyrky täsir okuwçynyň tehnologiýany materiala düşünmek üçin ulanýandygyna ýa-da ýumuşlary bütinleý oňa tabşyrýandygyna bagly bolup biler.
