Gazagystanyň paýtagtynda dikligine göterilýän we gonýan (eVTOL) AutoFlight Prosperity elektrik howa gämisiniň ilkinji görkezme uçuşy geçirildi.
Synaglar AutoFlight hytaý kompaniýasynyň we Gazagystanyň Alatau Advance Air Group operatorynyň bilelikdäki taslamasynyň çäginde «Kazanat» aýlawynyň meýdançasynda geçirildi.
Synag wagtynda enjam howada 10 minut töweregi boldy we 2,4 kilometr aralygy geçdi. Uçuş doly awtomatik režimde geçirildi: howa gämisi hünärmenleriň gözegçiligi astynda bellenen ugur boýunça özbaşdak iki öwrümi ýerine ýetirdi. Konstruksiýada adamlary gatnatmak göz öňünde tutulan hem bolsa, howpsuzlyk sebäpli kabina boş galdyryldy.
AutoFlight Prosperity bir uçarmana we bäş ýolagça niýetlenendir. Ol «lift and cruise» shemasyny ulanýar, munda aýratyn elektrik hereketlendirijiler dikligine göterilmegi we gonmagy, marş hereketlendirijisi bolsa keseligine uçuşy üpjün edýär.
Aerotaksi 13 sany elektrik hereketlendirijisi bilen enjamlaşdyrylan, ol tizligi sagatda 200 km çenli artdyrmaga we akkumulýatorlaryň bir zarýadynda 200 km çenli aralygy geçmäge ukyplydyr.
Işläp düzüjiler elektrik güýç gurluşynyň şeýle howa gämilerini adaty dikuçarlar bilen deňeşdirilende has sessiz we ulanmakda arzan edýändigini belleýär. Olary giňden ornaşdyrmak üçin esasy päsgelçilikler bolsa ygtyýarnamalaşdyrma we ulanmak üçin ýörite infrastrukturany döretmek meseleleri bolmagynda galýar.
