Aşgabatda düýpli abatlaýyş işlerinden soň, Türkmenbaşynyň Olimpiýa suw–sport toplumy gaýtadan açyldy.
Desganyň täzelenen infrastrukturasy halkara standartlaryna doly laýyk gelýär we halkara derejesindäki türgenleşikleri hem-de ýaryşlary geçirmäge mümkinçilik berýär.
Toplum 1741 tomaşaça niýetlenen bolup, ol ýüzmek, suwa bökmek, suw polosy we sinhronly ýüzmek boýunça ýaryşlary geçirmek üçin niýetlenendir.
Desganyň düzümine 50 metrlik ýüzüş basseýni, suwa bökmek üçin basseýn, akwapark, çagalar basseýni, trenažýor we sport zallary, saunalar, lukmançylyk otagy, naharhana hem-de sportuň oýun görnüşleri üçin açyk meýdançalar girýär.
Ýaryşlary geçirmek üçin basseýn döwrebap ýagtylyk we ses enjamlary, şeýle hem suw astyndaky wideogözegçilik ulgamlary bilen üpjün edildi. Täzelenen toplum diňe bir türgenleri taýýarlamak üçin däl, eýsem milli we halkara ýaryşlary geçirmek üçin hem niýetlenendir.
