Amerikanyň Eli Lilly farmasewtika kompaniýasy semizlige we süýjükesele garşy niýetlenen ýörgünli dermanlaryň satuwyndan gelen girdejileri endometrioz, preeklampsiýa we süňk kesellerini barlamaga sarp etmegi meýilleşdirýär. Kompaniýanyň pikiriçe, bu sökelliklere uzak wagtdan bäri ýeterlik üns berlenok.
Kompaniýa täze taslamanyň üstünde işlemek üçin eýýäm reproduktiw lukmançylygyň hünärmeni Kelle Moliň ýolbaşçylygynda alymlar toparyny döretdi we lukmançylyk startapyna maýa goýup başlady.
Soňky ýyllarda kompaniýa ýürek-damar ulgamynyň madda alyş-çalşygyna, onkologiýa, neýroylymlara we immunologiýa ünsüni jemläpdi. Indi bolsa Eli Lilly nazaryny «zenanlaryň saglygyny gowulandyrmak üçin hakyky mümkinçilige» gönükdirdi.
Bütindünýä ykdysady forumynyň maglumatlaryna görä, zenanlaryň saglygyny gowulandyrmaga gönükdirilýän hususy maýa goýumlaryň paýy bary-ýogy 6 göterime deňdir. Şunuň bilen bir hatarda, zenanlaryň ýer ýüzüniň ilatynyň tas ýarysyna golaýyny düzýändigini göz öňünde tutmalydyr.
Kompaniýanyň goşmaça gyzyklanmasy zenanlaryň arasynda semizlige garşy dermanlaryň giňden ulanylmagy bilen baglanyşyklydyr. Barlaglar agramyň birden peselmeginiň saglyk meselelerine we hususan-da ýaşy uly aýallarda süňk dykyzlygynyň peselmegine getirip biljekdigini görkezýär. Häzirlikçe şeýle täsir baradaky ylmy maglumatlar gapma-garşylykly bolmagynda galýar.
Maý aýynda Eli Lilly täze ugra ýolbaşçylyk etmek üçin Kelle Moli öz tarapyna çekdi. Şeýle-de ol endometriozy bejermegiň synag usullaryny döretmek üçin Absci Corp. biotehstartapyna 40 million dollar maýa goýberdi we önelgesizlige sebäp bolýan bakteriýalara garşy waksinalary döredýän LimmaTech Biologics kompaniýasyny satyn aldy.
Semizlige garşy derman bazarynda Eli Lilly-niň esasy bäsdeşi bolan Novo Nordisk hem şoňa meňzeş ýoly saýlap aldy. Daniýanyň bu kompaniýasy hem şeýle dermanlaryň aýal organizmine dürli döwürlerde, şol sanda menopauza wagtynda edýän täsirini öwrenýär.
