2026-njy ýylyň 30-njy sentýabryna çenli ýagdaýa görä, Türkmenistan bilen Hytaý Halk Respublikasynyň arasynda amala aşyrylan tebigy gaz söwdasynyň umumy möçberi 477 milliard kub metre ýetdi. Bu barada Aşgabatda geçirilýän OGT 2026 halkara maslahatynda CNPC International Turkmenistan kompaniýasynyň baş direktory Du Ýumin habar berdi.
Onuň bellemegine görä, Türkmenistan — Hytaý magistral gaz geçirijisi arkaly tebigy gazyň durnukly iberilmegini 2007-nji ýylda baglaşylan Önümi paýlaşmak hakynda şertnamanyň esasynda özleşdirilýän Amyderýanyň sag kenaryndaky «Bagtyýarlyk» şertnamalaýyn çäginiň gaz känleri üpjün edýär.
Du Ýumin iki ýurduň arasyndaky strategik hyzmatdaşlygyň täze tapgyra çykandygyny nygtady. 2026-njy ýylyň 17-nji aprelinde Mary welaýatynda dünýäniň iň iri gaz ýataklarynyň biri bolan «Galkynyş» gaz känini özleşdirmegiň IV tapgyrynyň işe girizilmegi bu ugurdaky hyzmatdaşlyga täze itergi berdi. Bu dabara türkmen halkynyň Milli Lideri Gurbanguly Berdimuhamedowyň we Hytaý Halk Respublikasynyň Döwlet geňeşiniň Premýeriniň birinji orunbasary Din Sýuesýanyň gatnaşmagy taslamanyň strategik ähmiýetini aýdyň görkezdi.
Kompaniýanyň ýolbaşçysy CNPC-niň mundan beýläk hem türkmen hyzmatdaşlary bilen iri energetika taslamalaryny durmuşa geçirmekde tehnologik, inženerçilik we maýa goýum mümkinçiliklerini utgaşdyrmaga taýýardygyny tassyklady. Hyzmatdaşlygyň geljekki ösüşi diňe bir gaz çykarylyşynyň möçberlerini artdyrmak bilen çäklenmän, eýsem häzirkizaman tehnologiýalaryny ornaşdyrmak, önümçilik amallaryny sanlylaşdyrmak hem-de ekologiýa taýdan jogapkär çözgütleri giňden ulanmak arkaly berkitmelidir.
