Hytaýyň Guançžou şäherinde ýerleşýän Sany Irootech Headquarters binagärlik toplumy Dik şähergurluşyk geňeşi (Council on Vertical Urbanism) tarapyndan dünýäniň iň gowy beýik binasy diýlip ykrar edildi.
Eminler topary iki diňiň adaty bolmadyk gurluşyny aýratyn belledi. Bu çözgüt binalaryň güýçli ýele döz gelmegine we seýsmiki işjeňlige uýgunlaşmagyna ýardam edýär.
Toplum gurluşyk tehnikalaryny öndürýän «Sany» kompaniýasynyň buýrugy boýunça «Skidmore, Owings & Merrill» binagärlik býurosy we Pekin binagärlik taslama instituty tarapyndan taslanyldy. Ol beýikligi 204 we 186 metre deň bolan iki sany gökdirän binadan ybarat.
Gökdiränleriň esasy binagärlik aýratynlygy daşky diwarlaryndaky açyk altyburçly gözeneklerdir. Bu kese ýerleşdirilen bölekler daýanç wezipesini ýerine ýetirmek bilen, asimmetrik şekili emele getirýär.
Bu karkaslar beton bilen doldurylan polat turbalardan ýasalyp, her bäş gatdan dördüsi daşky daýanç gurluşyna berkidilendir. Munuň netijesinde diňleriň içki böleginde sütünleri ulanmak zerurlygy aradan aýrylyp, giň we gurluş meýilnamasyny üýtgedip bolýan boşluklary döretmek mümkin bolupdyr.
Toplumda ofisler, myhmanhana we ýaşaýyş jaýlary ýerleşýär. Her bäş gatdan açyk jemgyýetçilik meýdançalary hökmünde hyzmat edýän ýaşyl zolakly eýwanlar göz öňünde tutulypdyr. Olar kölege salyp, otaglaryň aşa gyzmagynyň öňüni almaga hem ýardam edýär. Mundan başga-da, binalaryň daşky diwarlarynda howanyň tebigy aýlanyşyny üpjün etmek üçin wentilýasion gözenekler we we aýna gapylar ýerleşdirilipdir.
Iki diňiň arasy göterme stilobat bilen birleşdirilipdir. Bu çözgüt bag-bakjaly we sungat eserleri bilen bezelen jemgyýetçilik meýdançasyny döretmäge ýer açypdyr.
Dik şähergurluşyk geňeşiniň baýragy Londonda geçirilen dabarada gowşuryldy.
