Angliýanyň Dewon graflygynda kimdir biri Çadli-Naýton-Hit tebigy goraghanasyndan adaty inçebaş garynjalaryň hinini gazyp alypdyr we äkidipdir. Garynjalaryň bu görnüş Angliýada diňe şu goraghananyň çäginde saklanyp galypdy, şonuň üçin, hatda bir koloniýanyň ýitmegi hem onuň populýasiýasyna düýpli täsir edip biler diýip, «The Guardian» habar berýär.
Ogurlygy ekologlar oktýabr aýynyň ortalarynda meýilnamalaýyn barlag wagty ýüze çykardy. Garynja hininiň ýerinde hünärmenler çukur we pil bilen işlenilen yzlary gördi. Bellenilişi ýaly, hinde bir müňden bäş müňe çenli garynja bolmagy mümkin.
Britaniýanyň Daşky gurşawy goramak, azyk we oba hojalygy departamentinden Stiwen Hassiniň pikiriçe, ogry koloniýalaryň ýerleşýän ýerini öňünden öwrenip, haýsy garynja hinini gözleýändigini anyk bilen bolmaly. Onuň aýtmagyna görä, ýörite bilimi bolmadyk adam üçin şeýle hini tapmak aňsat bolmazdy.
Ol ogurlygyň mümkin bolan sebäpleri hökmünde garynja hinini başga ýaşaýyş gurşawyna göçürmek ýa-da hususy mör-möjekler ýygyndysynyň üstüni ýetirmek islegini görkezdi. Ýöne koloniýany özbaşdak göçürmek uly töwekgelçilikler bilen baglanyşykly: munuň üçin ylmy bilimler we tejribe zerur, göçürilen garynja hini bolsa täze ýere öwrenişmän hem biler.
Adatça, bir koloniýada 1000-den 5000-e çenli garynja we ömri 25 ýaşa çenli ýetip biljek bir ýa-da birnäçe ene garynja bolýar. Soňky ýüzýyllygyň dowamynda tebigy ýaşaýyş gurşawyna zyýan ýetmegi sebäpli, bu görnüşiň sany ep-esli azaldy. Halkara tebigaty goramak birleşiginiň Gyzyl sanawynda ol «ejiz» diýlip görkezilýär.
Inçebaş garynjalaryň populýasiýasyny dikeltmek boýunça hünärmen Juliýa Balfur bolan wakany uly ýitgi diýip atlandyrdy:
«Inçebaş garynjalaryň koloniýalary haýal ösýär we uzak ýaşaýan ene garynjalary bolan her bir ýetişen garynja hini — bu çalt dikeldip bolmajak köpýyllyk ösüşiň netijesi. Bu ýabany guşlaryň ýumurtgalaryny bikanun ýygnamakdan hiç hili kem bolmadyk jenaýatdyr. Ol tebigatymyzyň we ýabany ýerlerimiziň nähili basyş astyndadygyny görkezýär».
Bu hadysa barada Dewon we Kornuoll polisiýasyna habar berildi. Tebigy goraghananyň çägine bilkastlaýyn zyýan ýetirmek ýa-da onuň çeşmelerini ele salmak jenaýatçylykly günä hasaplanyp bilinýär.
